Anime salve
ZE |
Sta pagina a l'é scrita in zeneise, segondo a grafia unitäia |
Anime salve o l'é o trezzen e urtimo album in studio do cantautô italian Fabrizio De André, pubricou a-i 19 de settembre do 1996 da-a BMG Ricordi e realizzou insemme a-o Ivano Fossati, compoxitô de boña parte da muxica.[1]
Reçevimento
[modìfica | modìfica wikitèsto]
L'album o l'à avuo un reçevimento ben ben poxitivo, tanto da-i critichi muxicali, che gh'an assegnou a Targa Tenco do 1997,[2] comme da-o ponto de vista commerçiale: o l'é introu drito a-o primmo pòsto da clascifica FIMI di album[3] e dapeu o l'à ottegnuo a çertificaçion de treggio disco de platino in Italia.[4]
O tòcco Smisurata preghiera, contegnuo into disco, o l'à guägno o Premio Lunezia pe-a qualitæ muxicale e letteräia, reconoscimento motivou da-a Fernanda Pivano into luggio do 1997 à Aulla. Torna à Aulla, do 2021, unna neuva ciassa à l'incroxo di sciummi Aulella e Magra a l'é stæta intitolâ a-a canson Smisurata preghiera, pe iniçiativa do Premio Lunezia: o primmo adresso çivico d'Italia dedicou à unna canson.
Do 2025, à Sanremmo, in occaxon da restrutturaçion de l'abergo Europa Palace, l'é stæto creou un'installaçion artistica inspirâ a-o tòcco Le acciughe fanno il pallone.[5]
Stöia
[modìfica | modìfica wikitèsto]Anime salve o l'é o fruto de un travaggio fæto insemme da-o De André e da-o seu collega Ivano Fossati, zeneise comme lê e za seu collaboratô occaxonale into passou, autô de boña parte da muxica. O Fossati o l'à dito a-o Riccardo Bertoncelli che o Fabriçio o l'aiva scrito o 90% di testi — ben che con quarche idea e intuiçion seu — e lê o 90% da muxica, ben che con quarche contribuçion do De André; ma into fâ sto travaggio no gh'é stæto ninte de programmou, tutto o l'é stæto instintivo.[6]
O disco o l'é tegnuo da tanti pe-o testamento artistico do De André, no solo che muxicale ma ascì spirituale, mascine pe l'urtimo tòcco Smisurata preghiera, ben che, into momento che Anime salve o l'é stæto realizzou, o De André o no saveiva ancon da moutia ch'a l'aviæ portou a-a mòrte pöco ciù de doî anni apreuvo; ançi, o l'aiva za comensou à pensâ à di atri travaggi discografichi pöco dòppo a pubricaçion de l'album.[7]
Contegnuo
[modìfica | modìfica wikitèsto]Co-i tòcchi do disco, o cantautô o fa un viægio into mondo di umei, di escluxi e di ascordæ, figue che en stæte delongo ben presente inti seu testi pe tutta a seu carriera. O tema primmäio a l'é a solitæ, inte tutte e seu forme: quella de persoñe transgender, di Rom, de l'amante, do pescou; ma ascì quella poxitiva, çernua comme condiçion ideale. O mæximo titolo de l'album o vëgne da l'etimologia de poule «anime» e «salve», che a-a lettia veu dî «spriti solitäi».[7] Tutto o disco o peu ëse tegnuo pe un «elögio da solitæ», vista comme unna condiçion ch'a permette d'ëse liberi e no condiçionæ da-a soçietæ, comme spiegou da-o mæximo De André inte un conçerto che dapeu o l'é stæto pubricou into disco Ed avevamo gli occhi troppo belli:
| (IT)
«[Anime salve] trae il suo significato dall'origine, dall'etimologia delle due parole "anime" "salve", vuol dire spiriti solitari. È una specie di elogio della solitudine. Si sa, non tutti se la possono permettere: non se la possono permettere i vecchi, non se la possono permettere i malati. Non se la può permettere il politico: il politico solitario è un politico fottuto di solito. Però, sostanzialmente quando si può rimanere soli con se stessi, io credo che si riesca ad avere più facilmente contatto con il circostante, e il circostante non è fatto soltanto di nostri simili, direi che è fatto di tutto l'universo: dalla foglia che spunta di notte in un campo fino alle stelle. E ci si riesce ad accordare meglio con questo circostante, si riesce a pensare meglio ai propri problemi, credo addirittura che si riescano a trovare anche delle migliori soluzioni, e, siccome siamo simili ai nostri simili credo che si possano trovare soluzioni anche per gli altri. Con questo non voglio fare nessun panegirico né dell'anacoretismo né del romitaggio, non è che si debba fare gli eremiti, o gli anacoreti; è che ho constatato attraverso la mia esperienza di vita, ed è stata una vita, credo di averla vissuta; mi sono reso conto che un uomo solo non mi ha mai fatto paura, invece l'uomo organizzato mi ha sempre fatto molta paura.» |
(LIJ)
«[Anime salve] o piggia o seu scignificato da l'origine, da l'etimologia de doe poule «anime» «salve»: veu dî spriti solitäi. O l'é unna smersa de elögio da solitæ. Se sa, no tutti se â peuan permette: no se â peuan permette i veggetti, no se â peuan permette i maròtti. No se â peu permette o politico: o politico solitäio o l'é pe-o sòlito un politico futuo. Ma, in sostansa, quande se peu restâ soli con lê mæximi, mi creddo che s'arriësce à avei ciù de lengê contatto con quello ch'o ne stà d'in gio, e sto d'in gio o no l'é fæto solo che di nòstri pægi: diæ ch'o l'é fæto de tutto l'universo, da-a feuggia ch'a sciòrte de neutte inte un campo fin a-e stelle. E se s'arriësce à intonâse megio con sto d'in gio, s'arriësce à pensâ megio a-i seu problemi, e creddo ascì che s'arriësce à attrovâ de megio soluçioin; e, dæto che semmo pægi a-i nòstri pægi, creddo che se peu attrovâ de soluçioin ascì pe-i atri. Con questo no veuggio fâ nisciun panegirico ni de l'anacoretiximo ni do romitaggio, no l'é che s'à fâ i ermitti ò i anacoreti; l'é che ò constatou co-a mæ esperiensa de vitta — e a l'é stæta unna vitta, che creddo d'aveila visciua — me son dæto conto che un òmmo solo o no m'à mai fæto poia, ma l'òmmo organizzou o m'à delongo fæto mai tanta poia.» |
| (Fabrizio De André, Elogio della solitudine, da Ed avevamo gli occhi troppo belli) |
O mæximo De André, into conçerto tegnuo a-o Teatro Brancaccio de Romma do 1998, o definià Anime salve un «descorso in sciâ libertæ».[8]
E cansoin de l'album, arrangiæ da-o Piero Milesi (ascì co-produttô e passou membro do Gruppo Folk Internazionale),[9] en caratterizzæ da unna reçerca de son indirissâ a-i ritmi e i temi tipichi de coltue muxicale sudamericañe, cäi a-o Fossati ma che an appascionou ascì o De André fin da ch'o l'ea zoveno, e a-o tropicaliximo do Caetano Veloso; gh'é però ascì de referense ciæe a-e atmosfere balcaniche e mediterranee. Doî tòcchi do disco, Princesa e Smisurata preghiera, en inspiræ à de euvie letteräie.[10]
Inti seu urtimi chinz'anni d'attivitæ artistica, o De André o l'à addeuviou assæ i e lengue despæge da l'italian, e st'urtimo disco o no fa ecceçion: i cöi into finale de Princesa en in portogheise do Braxî, i cöi de Dolcenera e tutto o testo de  cúmba en in zeneise, o finale de Khorakhané o l'é in lengua romaní e o titolo da sesta canson, Disamistade, o l'é un termine sardo de fòrte scignificato soçiale.
Inti ringraçiamenti gh'é ascì unna dedica a-o percuscionista Naco, pseudònimo do Giuseppe Bonaccorso, mòrto pöchi meixi primma da pubricaçion do disco inte un açidente da stradda. O Naco o fa de parte instrumentale inte tutti i tòcchi de l'album, con dâ un gran contributo a-e sonoritæ con tanti instrumenti feua da-o commun.
Bibliografia
[modìfica | modìfica wikitèsto]- Riccardo Bertoncelli (a cua de), Belin, sei sicuro? Storia e canzoni di Fabrizio De André, Firenze, Giunti, 2003. ISBN 88-09-02853-8
Ligammi esterni
[modìfica | modìfica wikitèsto]- (IT) Dolcenera e l'alluvione di Genova, 1970, in sce creuzadema.net.
- (IT) Lo speciale dedicato ai 20 anni dall'uscita dell'album, 2016, in sce faberdeandre.com.
Nòtte
[modìfica | modìfica wikitèsto]- ↑ Riccardo Bertoncelli (à cua de), Belin, sei sicuro?, çit., p. 76.
- ↑ (IT) Laura Putti, Ma la canzone d'autore ha perso la sua diversità, in sce la Repubblica, Sanremo, 25 ottobre 1997, p. 42. URL consultòu o 12 maggio 2014 (archiviòu da l'url òriginâle o 12 màzzo 2014).
- ↑ (IT) Mario Luzzatto Fegiz, Dalla vince il cuore dei giovani, in sce Corriere della Sera, Milano, 8 ottobre 1996, p. 37. URL consultòu l'11 maggio 2014 (archiviòu da l'url òriginâle o 12 màzzo 2014).
- ↑ (IT) Giacomo Pellicciotti, De André a gonfie vele, in sce la Repubblica, 12 febbraio 1997, p. 40. URL consultòu o 27 novembre 2020 (archiviòu da l'url òriginâle o 15 frevâ 2018).
- ↑ (IT) Studio C&C, Acciughe - Paolo Albertelli - STUDIO C&C, in sce Studio C&C - Albertelli, Abbaldo, 6 arvî 2025. URL consultòu o 15 òtôbre 2025.
- ↑ Bertoncelli 2003, p. 146.
- 1 2 (IT) Claudio Fabretti, Fabrizio De André In direzione ostinata e contraria, in sce OndaRock. URL consultòu l'11 maggio 2014.
- ↑ (IT) Fabrizio De André - Biografia e Discografia, in sce popon.it. URL consultòu o 10 dicembre 2010 (archiviòu da l'url òriginâle o 10 dexénbre 2010).
- ↑ (IT) Addio a Piero Milesi, in sce Rockol.it, 31 ottobre 2011. URL consultòu l'11 maggio 2014.
- ↑ (IT) Giuseppe Videtti, Fabrizio De André - La discografia, in sce Musica! (la Repubblica). URL consultòu l'11 maggio 2014.
