Mary, Queen o Scots

Mary Stuart
Portrait o Mary efter François Clouet, c. 1559
Queen o Scots
Ring	14 December 1542 – 24 Julie 1567
Crounin	9 September 1543
Antecessor	James V
Successor	James VI
Regent	James Hamilton, 2t Earl o Arran (1542–1554) Mary o Guise (1554–1560)
Queen consort o Fraunce
Time In Office	10 Julie 1559 – 5 December 1560
Born	7/8 December 1542 Lithgae Palace, Lithgae
Dee'd	8 Februar 1587(1587-02-08) (aged 44) Fotheringhay Castle, Northamptonshire
Buirial	Peterborough Cathedral; Wastminster Abbacy
Hauf-Marrow	Francis II o Fraunce m. 1558; dec. 1560 Henry Stuart, Laird Darnley m. 1565; dec. 1567 James Hepburn, 4t Yerl o Boddle m. 1567; dec. 1578
Issue	James VI o Scotland an I o Ingland
Full name Mary Stuart
Hous	o Stuart (bi birth) o Valois (bi first mairriage)
Faither	James V o Scotland
Mither	Mary o Guise
Releegion	Roman Catholic
Seegnatur

Mary, Queen o Scots (7/8 December 1542 – 8 Februar 1587), kent as Mary Stuart or Mary I o Scotland forbye, wis Queen Regnant o Scotland frae 14 December 1542 tae 24 Julie 1567 an Queen Consort o Fraunce frae 10 Julie 1559 tae 5 December 1560.

Mary, the anely survivin leesome bairn o James V o Scotland, wis sax days auld whan her faither dee'd an she heired the throne. She wared the maist o her bairnheid in Fraunce while Scotland wis ruled bi regents, an in 1558, she mairried the Dauphin o Fraunce, Francis. He muntit the French throne as King Francis II in 1559, an Mary for a whilikie becam Queen Consort o Fraunce, till his daith in December 1560. Widdaed, Mary cam back tae Scotland, arrivin in Leith on 19 August 1561. Fower year efter, she mairried her first kizzen, Henry Stuart, Laird Darnley, but their union wis onseely. In Februar 1567, his wonne wis connached wi a flist, an Darnley wis fund murthert in the gairden.

James Hepburn, 4t Yerl o Boddle, wis generally trou'd tae hae been the deid o Darnley's daith, but he wis assoilzied in Aprile 1567, an the follaein month he mairried Mary. Follaein a raibblin agin the twasome, Mary wis warded in Loch Leven Castle. On 24 Julie 1567, she wis garred tae gie ower the croun in fauvour o James VI, her ane-year-auld son bi Darnley. Efter a misgied ettle tae win back the croun, she flichtit soothwarts seekin the bield o her first kizzen aince remuived, Queen Elizabeth I o Ingland. Mary haed claimed Elizabeth's throne as her ain afore an mony Inglis Catholics held her for the leesome sovereign o Ingland, amang thaim wir pairt-takers in a rebellion kent as the Risin o the North. Haudin her for a menace, Elizabeth haed her steekit in various castles an big-hooses in the hert o Ingland. Efter eichteen an a hauf year in wardin, Mary wis fund guilty o colleaguin tae hae Elizabeth assassinatit in 1586. She wis heidit the follaein year.

Bairnheid an early reign

Mary wis born on 8 December at Linlithgow Pailace, Scotland, tae King James an his French seicont wife Mary o Guise. She wis thocht tae been born prematurely an wis the ainly leesome bairn o James tae survive him. She wis grand-niece tae King Henry VIII o Ingland, sin her grandmither on her faither's side wis Henry VIII's sister. On 14 December, whan she wis sax days auld, her faither dee'd, aiblins frae the effects o a nervish clyte follaein the Stour o Solway Moss or frae drinkin fyle't watter while on campaign, an Mary becam Queen o Scotland.