Ipinapakita sa artikulong ito ang mga katinig na nasa Internasyonal na Ponetikong Alpabeto (IPA) na may kaakibat na tunog. Nakabase ito sa opisyal na talahanayan ng mga katinig ng IPA, na huling binago noong 2020. IPA ang pandaigdigang sistema ng notasyon para maisulat ang lahat ng mga tunog sa mga wika ng tao, at pinapanatili ng Internasyonal na Ponetikong Asosasyon na siya ring gumawa sa naturang notasyon.
Nahahati ang mga katinig sa dalawang uri: pulmoniko at di-pulmoniko. Pulmonikong katinig ang mga katinig na nabubuo sa pamamagitan ng paglabas ng hangin mula sa baga at pinipigilan sa pamamagitan ng pag-ipit sa lalamunan o sa ibang bahagi ng bibig, habang di-pulmonikong katinig naman ang mga katinig na hindi nakadepende sa baga upang mabuo ang tunog. Karamihan sa mga wika ng tao ay nagtataglay lamang ng mga pulmonikong katinig; nasa 20% lamang ng mga wika ang nagtataglay ng mga di-pulmonikong katinig.[1]
Nasa kanan ang matunog na anyo, habang nasa kaliwa naman ang di-matunog na anyo ng bawat katinig. Ipinapakita ng mga nakaitim na lugar ang mga artikulasyon na ipinagpapalagay na imposibleng magawa ng tao.
