Drježdźansko-Mišnjanske biskopstwo

Wopon Drježdźansko-Mišnjanskeho biskopstwa wobsteji z woponow doreformaciskich biskopstwow Mjezybor, Naumburg-Žitč a Mišno.

Drježdźansko-Mišnjanske biskopstwo (łaćonsce Dioecesis Dresdensis-Misnensis), do 1979 Mišnjanske biskopstwo, je biskopstwo romsko-katolskeje cyrkwje ze sydłom w Drježdźanach. Dieceza je so w lěće 1921 znowa wutworiła. Jeho katedrala je pod kurwjerchom Bjedrichom Awgustom II. wot 1739 do 1751 natwarjena Dwórska cyrkej Trinitatis w Drježdźanach, konkatedrala je tachantska cyrkej swj. Pětra w Budyšinje. Patron biskopstwa je Swjaty Beno z Mišna. Dalšej patronaj staj swj. Donatus z Arezza a swj. Afra z Augsburga.

Na teritoriju Drježdźansko-Mišnjanskeho biskopstwa bydli wjetšina katolskich Serbow.

Teritorij

Biskopstwo rozpřestrěwa so nimale přez cyły teritorij Sakskeje, nimo něhdy pruskich dźělow Hornjeje Łužicy a juhowuchodneho dźěla něhdyšeje pruskeje Prowincy Sakskeje. Nimo toho słušeja do biskopstwa dźěle Durinskeje, a to teritorije slědowacych něhdyšich durinskich statow:

• wójwodstwo Sakska-Starohródska
• wjerchowstwo Reuß młódša linija (wokoło Gery)
• wjerchowstwo Reuß starša linija (Greiz).

Rozrjadowanje

Drježdźansko-Mišnjanske biskopstwo podsteji Berlinskemu a rozrjaduje so wot 1. januara 2026 do tutych pjeć dekanatow:

• Budyšin
• Kamjenica
• Drježdźany
• Gera-Pławno-Šwikawa
• Lipsk

Do 2026 wobstejachu dekanaty Gera, Pławno a Šwikawa kaž tež Mišno, kotryž bu zjednoćeny z Drježdźanskim dekanatom.

Wotkazaj

 Commons: Drježdźansko-Mišnjanske biskopstwo – Zběrka wobrazow, widejow a awdiodatajow

• Oficielne webstrony