သန်းညိန်း

ဦး သန်းညွန်း
၁၂ ဦးမြောက် မြန်မာနိုင်ငံတော်ဗဟိုဘဏ် ဥက္ကဋ္ဌ
တာဝန်သက်တမ်း ၂ ဖေဖော်ဝါရီ ၂၀၂၁ – ၁၉ ဩဂုတ် ၂၀၂၂
ခန့်အပ်သူ	နိုင်ငံတော်စီမံအုပ်ချုပ်ရေးကောင်စီ
လက်ထောက်	ဦးဝင်းသော် (ဒုဥက္ကဋ္ဌ) ဒေါ်သန်းသန်းဆွေ (ဒုဥက္ကဋ္ဌ)
ယခင်လူ	ဦးကျော်ကျော်မောင်
ဆက်ခံသူ	ဒေါ်သန်းသန်းဆွေ
၁၀ ဦးမြောက် မြန်မာနိုင်ငံတော်ဗဟိုဘဏ် ဥက္ကဋ္ဌ
တာဝန်သက်တမ်း ၁၂ ဧပြီ ၂၀၀၇ – ၃၁ ဇူလိုင် ၂၀၁၃
ခန့်အပ်သူ	ဗိုလ်ချုပ်မှူးကြီး သန်းရွှေ ဦးသိန်းစိန် (သမ္မတ)
ယခင်လူ	ဦးကျော်ကျော်မောင်
ဆက်ခံသူ	ဦးကျော်ကျော်မောင်
ကိုယ်ရေး အချက်အလက်များ
မွေးဖွား	(1952-02-29) ဖေဖော်ဝါရီ ၂၉၊ ၁၉၅၂ ကော့ကရိတ်မြို့၊​ ကရင်ပြည်နယ်၊​ ပြည်ထောင်စုမြန်မာနိုင်ငံ
ကြင်ဖော်	ဒေါ်ခင်သွယ်သွယ်မြင့်
သားသမီး	သား ၂ဦး

ဦးသန်းညိန်း (၂၉ ဖေဖော်ဝါရီ ၁၉၅၂ ဖွား) သည် မြန်မာနိုင်ငံတော်ဗဟိုဘဏ်၏ ယခင် ဥက္ကဋ္ဌတစ်ဦး ဖြစ်ပြီး နိုင်ငံတော်စီမံအုပ်ချုပ်ရေးကောင်စီလက်ထက်တွင် မြန်မာနိုင်ငံ၏ ငွေကြေးဆိုင်ရာ မူဝါဒများကို ဦးဆောင်ခဲ့သူဖြစ်သည်။  

ဝန်ထမ်းဘဝ

ဦးသန်းညိန်းသည် စစ်မှုထမ်းတစ်ဦးဖြစ်ပြီး ၂၀၀၀ ပြည့်နှစ် နောက်ပိုင်းတွင် တပ်မတော် မှနေ၍ ဗိုလ်ချုပ် လှထွန်း ဦးဆောင်သော ဘဏ္ဍာရေး နှင့် အခွန်ဝန်ကြီးဌာန လက်အောက်ရှိ မြန်မာနိုင်ငံတော်ဗဟိုဘဏ် တွင်ဗိုလ်မှူးကြီးရာထူးဖြင့် ဒုတိယဥက္ကဋ္ဌ အဖြစ် တာဝန်ထမ်းဆောင်ခဲ့သည်။

ထိုစဉ်ကာလက ဗဟိုဘဏ်သည် သီးခြားလွတ်လပ်သည့် အဖွဲ့အစည်းမဖြစ်သေးဘဲ ဘဏ္ဍာရေး နှင့် အခွန်ဝန်ကြီးဌာန လက်အောက်တွင် ဌာနတစ်ခုအဖြစ် ရပ်တည်နေချိန်ဖြစ်သည်။ဝန်ကြီး ဗိုလ်ချုပ်လှထွန်း နှင့် ရင်းနှီးသည့် ဆက်ဆံရေးရှိသူ ၎င်းသည် ၂၀၀၇ ခုနှစ် ဧပြီလ ၁၂ရက်နေ့တွင် ဗဟိုဘဏ်ဥက္ကဋ္ဌအဖြစ် ရာထူးတိုးမြှင့်ခြင်းခံရသည်။

ထိုတာဝန်ကို သမ္မတဦးသိန်းစိန် လက်ထက်ကာလ ၂၀၁၃ ခုနှစ် ဇူလိုင်လ ၃၀ ရက် အထိ တစ်ဆက်တည်း ဆက်လက်တာဝန်ထမ်းဆောင်ခဲ့သည်။

ဗဟိုဘဏ် ဥက္ကဋ္ဌ၊ဒုတိယဥက္ကဋ္ဌ ရာထူးတာဝန်များ

၂၀၁၃ ခုနှစ်၊ ဇူလိုင်လ (၁၁) ရက်တွင် ပြည်ထောင်စုလွှတ်တော် သည် ပြည်ထောင်စုလွှတ်တော်ဥပဒေအမှတ် ၁၆/၂၀၁၃ ဖြင့် မြန်မာနိုင်ငံတော်ဗဟိုဘဏ်ဥပဒေ အသစ်ကို ပြဋ္ဌာန်းခဲ့သည်။ အသစ်ပြဋ္ဌာန်းချက်အရ ဗဟိုဘဏ်သည် ဘဏ္ဍာရေးဝန်ကြီးဌာနလက်အောက်ခံ မဟုတ်ဘဲ နိုင်ငံတော်သမ္မတ၏ တိုက်ရိုက်ကွပ်ကွဲမှုအောက်တွင် သီးခြားလွတ်လပ်သည့် အဖွဲ့အစည်းတစ်ခုဖြစ်လာပြီး ဗဟိုဘဏ်ဥက္ကဋ္ဌ သည် ပြည်ထောင်စုဝန်ကြီးအဆင့်၊ ဒုတိယ ဥက္ကဋ္ဌ များသည် ဒုဝန်ကြီးအဆင့်အဖြစ် သတ်မှတ်ခဲ့ကြသည်။

၂၀၁၃ ခုနှစ် ဇူလိုင်လ ၃၁ရက်တွင် သမ္မတ ဦးသိန်းစိန် က ဗဟိုဘဏ်ဥက္ကဋ္ဌ အဖြစ် ဦးကျော်ကျော်မောင်၊ဒုတိယဥက္ကဋ္ဌများအဖြစ် ဦးသန်းညိန်း နှင့် ဒေါ် ခင်စောဦး တို့ကို ခန့်အပ်တာဝန်ပေးခဲ့သည်။

ထို့နောက် ဦးသန်းညိန်း သည် ၎င်း၏ သဘောဆန္ဒအလျောက် ဗဟိုဘဏ် ဒုတိယဥက္ကဋ္ဌ ရာထူးမှ နုတ်ထွက်ခွင့်ပြုရန် သမ္မတရုံးသို့ စာတင်ခဲ့ပြီး သမ္မတရုံးက ၂၀၁၃ ခုနှစ်၊ အောက်တိုဘာ ၂၃ ရက်စွဲပါ အမိန့်အမှတ် ၄၇/၂၀၁၃ ဖြင့် ရာထူးမှ အနားပေးခဲ့သည်။

၂၀၂၁ ခုနှစ် နောက်ပိုင်းအခြေအနေ

၂၀၂၁ ခုနှစ် ဖေဖော်ဝါရီလ ၄ ရက်တွင် ဦးသန်းညိန်းသည် နိုင်ငံတော်စီမံအုပ်ချုပ်ရေးကောင်စီ ၏ အမိန့်အမှတ် ၈/၂၀၂၁ ဖြင့် ဗဟိုဘဏ်၏ ဥက္ကဋ္ဌအဖြစ် ပြန်လည် ခန့်အပ်ခံရခဲ့သည်။​

၂၀၂၂ ခုနှစ် ဩဂုတ်လတွင် စစ်ကောင်စီက ဦးသန်းညိန်းအား ဗဟိုဘဏ်အုပ်ချုပ်ရေးမှူးရာထူးမှ ဖယ်ရှားကာ ဒေါ်သန်းသန်းဆွေကို အစားခန့်အပ်ခဲ့သည်။

ပုဂ္ဂိုလ်ရေးဘဝ

ဦးသန်းညိန်း သည် အိမ်ထောင်သည် တစ်ဦးဖြစ်သည်။၁၉၇၇ ခုနှစ် မေလ ၁ရက်နေ့တွင် ဇနီးဖြစ်သူ ဒေါ်ခင်သွယ်သွယ်မြင့် နှင့် အိမ်ထောင်ကျခဲ့ပြီး နိုင်ညိန်း နှင့် ချမ်းညိန်း သား ၂ဦး ထွန်းကားခဲ့သည်။

ဒဏ်ခတ်ပိတ်ဆို့ခံခြင်း

၂၀၂၁ ခုနှစ်၊ မေ ၁၇ ရက်တွင် အမေရိကန်အစိုးရက ဦးသန်းညိန်းအပါအဝင် စစ်ကောင်စီနှင့် ဆက်စပ်နေသူများအား ဒဏ်ခတ်စာရင်း ထည့်သွင်းခဲ့သည်။