感官超載

圖：有個人因為感覺超載而崩潰。

感官超載（參見英文：Sensory overload ），又或者叫感官過載、感官超負荷，係指一個或者多個感官受到太強嘅刺激。若果腦部無法有效噉處理排山倒海而嚟嘅刺激，人就會感到不舒、焦慮，甚至身體痛楚，仲有可能進入崩潰嘅狀態。

基本概念

睇埋：刺激 (心理學)、感官、感知同雞尾酒會效應

感官超載係腦部嘅一種正常反應。即使係一般人，喺極端環境下都可以經歷感官超載。

例如喺一個非常嘈雜、燈光係噉閃嘅夜總會空間，或者喺一個大型街市，充滿咗各種氣味、人頭湧湧且廣播聲不斷。刺激多得滯嘅時候，人會開始覺得難以專注，嚴重起上嚟仲可能會感到頭暈、心跳加速，好想即刻離開。呢啲都係腦部發出嘅警告訊號，叫身體快啲尋找安靜嘅環境。

感官超載呢個概念，喺腦力多元相關嘅討論當中成日提及。譬如係對於自閉症譜系 ASD 或者過度活躍症 ADHD 等嘅人士嚟講，感官超載係日常生活中一個嚴峻嘅挑戰，噉係因為佢哋嘅腦部對感官資訊嘅處理往往同常人唔同，佢哋嘅感官好多時都遠比一般人敏感，某一種聲，可能常人覺得佢嘈、不過仲頂得順，而自閉症譜系嘅人聽到就可能會耳仔覺痛，因為對自閉症譜系嘅人嚟講，嗰種聲可能好似行雷咁大聲。嚴重嘅話，腦力多元人士可能仲會崩潰，表現出激烈嘅情緒反應，例如大叫、喊等，亦有可能會關閉，變得沉默、呆滯，對外界冇晒反應。

亦有人會用感官超載嚟做一種酷刑。

身心徵狀

感官超載會產生一系列生理同心理徵狀，無論係大人定細路都有機會出現：

情緒與行為反應：

• 易嬲、焦躁、緊張
• 頭痛、心跳加快、肌肉緊張、猛咁流汗
• 封閉自己，拒絕參加活動、唔想同人交流
• 異常咁興奮
• 冇晒眼神接觸
• 社交有困難
• 發狼戾，甚至自殘
• 心煩意亂、坐立不安
• 想逃避環境、揞耳、遮住對眼、退縮
• 專注力下降、記憶力變差

若果係自閉症譜系人士等，感官過敏嘅人：

• 對觸覺、光或者聲波嘅反應過大
• 唔想同人接觸，唔想畀人掂到
• 埋怨一啲其他人覺得冇咩咁大影響嘅聲

相關病症

睇埋：腦力多元

有好多病症都可能會令到患者出現感官超載嘅情況。常見病症會引致感官超載：

1. 自閉症譜系障礙，Autism Spectrum Disorder

• 患者對光、聲、觸覺特別敏感，好容易喺人多嘈雜嘅環境出現感官超載。
• 可能會出現煩躁、哭鬧、逃避或者注意力集中困難。

2. 注意力不足過動症，ADHD

• 對環境嘅刺激反應過度，例如突然嘅聲、閃光嘅燈光。
• 會覺得分心、心煩意亂，甚至情緒爆發。

3. 焦慮症 / 驚恐症，Anxiety / Panic Disorders

• 情緒緊張時，對外界刺激變得更加敏感。
• 可能會出現頭痛、心跳加速、呼吸急促。

4. 感覺處理障礙，Sensory Processing Disorder, SPD

• 身體無法有效處理感官訊息，會對正常刺激產生過度反應或迴避。
• 例子包括討厭特定觸感、聲音或者光線。

5. 慢性疲勞綜合症 / 纖維肌痛症，Chronic Fatigue Syndrome / Fibromyalgia

• 身體容易攰，大腦處理感官刺激能力下降。
• 對光、聲敏感，容易頭暈或情緒不穩。

社會配合

喺二〇二〇年代起，社會開始關注點樣支援腦力多元人士。而對腦力多元人士嚟講，感官超載好多時都係融入社會嘅一大阻礙，搞到佢哋難以參與社會嘅各種活動。為咗支援佢哋，開始有研究者提倡感官友善空間嘅諗頭，主張可以設置特殊嘅空間，呢啲空間經過刻意嘅設計，務求令到容易感官超載嘅人士感到舒適。

感官友善空間，通常具備以下呢啲特徵：

• 燈光：避免使用掁眼嘅燈，改用柔和、溫暖嘅光源。
• 噪音：減少背景嘅音樂，或者提供耳塞等嘅物品。
• 氣味：避免使用氣味濃烈嘅香精或者清潔劑。
• 靜修室：提供完全安靜、細小而且光線昏暗嘅角落，啲人有需要就可以入去休息，恢復腦部平衡。

睇埋

• 專注力
• 城市化
• 資訊過多
• 行為沉淪

外拎

• （香港繁體）重新定義「感官友好」空間（上）