Coimbra

Coimbra
Vlag Wapen
Koördinate: 40°12′10″N 8°24′50″W
Land	Portugal
Streek	Região do Centro
Bevolking
• Totaal	140 796
• Digtheid	440,81/km2 (1 141,7/vk. myl)

Coimbra is ’n stad en ’n munisipaliteit in Portugal. Volgens die 2021-sensus was die bevolking van die munisipaliteit 140 796, in ’n gebied van 319,40 vierkante kilometer. Dit is die vierde grootste saamgevoegde stedelike gebied in Portugal ná Lissabon, Porto en Braga, en is die grootste stad van die distrik Coimbra en die Sentrale Streek. Ongeveer 460 000 mense woon in sy intermunisipale gemeenskap.

Onder die vele argeologiese strukture wat uit die Romeinse tydperk dateer, toe Coimbra die nedersetting Aeminium was, is die goed bewaarde akwaduk en kriptoportikus. Net so bestaan daar steeds geboue uit die tyd toe Coimbra die hoofstad van Portugal was (van 1131 tot 1255). Gedurende die laat Middeleeue, met sy agteruitgang as politieke sentrum van die Koninkryk van Portugal, het Coimbra begin ontwikkel tot ’n belangrike kulturele sentrum. Dit is grootliks bevorder deur die stigting van die eerste Portugese universiteit in 1290 in Lissabon en die verskuiwing daarvan na Coimbra in 1308, wat dit die oudste akademiese instelling in die Portugeessprekende wêreld maak. Benewens die aantrekking van baie Europese en internasionale studente, word die universiteit deur talle toeriste besoek vir sy monumente en geskiedenis. Sy historiese geboue is in 2013 deur UNESCO as ’n Wêrelderfenisterrein geklassifiseer: “Coimbra bied ’n uitstaande voorbeeld van ’n geïntegreerde universiteitstad met ’n spesifieke stedelike tipologie sowel as sy eie seremoniële en kulturele tradisies wat deur die eeue lewend gehou is.”