Argumentaro

En matematiko, la argumentaro (aŭ malbildo, aŭ domajno) de funkcio estas la aro $f^{-1}[Y]$ de tiuj elementoj de la fonta aro, por kiuj la funkcio estas difinita.

Funkcio $f:X\rightarrow Y$ kun fonta aro $X$ = {1, 2, 3}, cela aro $Y$ = {a, b, c, d}, argumentaro {2, 3} kaj bildaro {c, d}

Difino

Por funkcio $f\colon A\to B$, kiu ĵetas elementojn el la aro A (kiu en tia kunteksto nomiĝas la fonta aro) en la aron B (kiu nomiĝas la cela aro), oni nomas la aron konsistantan el ĉiuj elementoj de la aro A, por kiuj la funkcio f estas difinita, la argumentaro de f.

Elemento de la argumentaro nomiĝas argumento; la funkcio ĵetas argumenton $a\in A$ al ĝia bildo, $f(a)\in B$, kiu estas elemento de la cela aro $B$. Alie eblas diri, ke $a\in A$ apartenas al malbildo de $b\in B$, kiam $f(a)=b$. Tiasence, la argumentaro de funkcio $f\colon A\to B$ estas la malbildaro, la malbildo de ties tuta cela aro $B$.

Notacio

Kutime oni uzas la simbolon dom (kp domajno); ekz‑e

$\operatorname {dom} f=\mathbb {N}$   (t.e. la funkcio $f$ estas difinita sur la aro de ĉiuj naturaj nombroj);

$x\in \operatorname {dom} G$   ($x$ apartenas al la domajno/argumentaro de la funkcio $G$).

Analogiaj uzoj de domajno

En la teorio de komputebleco, por algoritmo aŭ rekursia funkcio $A$ ĝia domajno estas la aro de ĉiuj argumentoj por kiuj $A$ konverĝas:

$\operatorname {dom} A=\{x:A(x)\downarrow \}$

En rilata datumbazo, en Microsoft Excel ktp, la aro de la valoroj, akcepteblaj por koncerna tabelvertikalo.