伏筆

油畫：喺希伯來聖經《創世紀》入便，夢者若瑟年輕嘅時候曾經發夢，見到太陽月亮同埋一眾星星向佢下跪，好耐之後...

油畫：若瑟喺埃及成為重臣，而佢嘅兄弟最後真係要向佢下跪。

埋下伏筆（英文：foreshadowing）係敘事技巧一種，講緊喺情節早期留低啲內容，呢啲內容暗示故事跟住落嚟會發生乜嘢事。而伏筆則係指用嚟暗示後期會發生咩事嘅內容。

基本諗頭

作者可以用好多唔同方法嚟埋下伏筆，例如透過角色之間嘅對話、情節中嘅事件，或者係背景設定嘅轉變等等。有陣時，就連作品或章節嘅標題，都可以成為暗示未來發展嘅線索。喺虛構作品中，伏筆有好多作用：

• 營造懸念，令到讀者有興趣想繼續追落去。
• 伏筆亦可以令到一啲奇特或者荒誕嘅事件感覺上合理啲：假如某件事一早暗示咗，到咗件事真係發生嗰時，讀者或觀眾就會覺得早就有心理準備，覺得發展合邏輯。

實用例子

希伯來聖經中對夢者若瑟個故事嘅敘述，都被指係用咗伏筆。喺故事早期，若瑟後生嗰陣發咗兩個奇怪嘅夢：喺第一個夢入便，佢見到佢兄弟啲禾捆向佢嘅禾捆下跪；而喺第二個夢入面，佢見到太陽、月亮同埋十一粒星向佢下跪；呢啲夢，扮演咗伏筆噉嘅角色，暗示若瑟第時會擁有極高地位，而且佢嘅屋企人最終會臣服於佢。

現代嘅虛構故事，諸如文學、電影以至視像遊戲等，都有機會用到伏筆嘅技巧。

電影嘅伏筆

電影入面嘅伏筆（foreshadowing），係指有啲細節一開始睇落好普通，但去到後面劇情發展時，先發現原來有特別意思，等故事「回收」返之前嘅提示。呢種手法可以令觀眾事後回想時覺得原來一早已經有暗示，增加故事層次 。

導演用伏筆有幾個原因。首先，可以建立懸念，令觀眾一路睇一路期待之後會發生咩事。其次，當劇情出現轉折時，有伏筆鋪墊會令轉折顯得合理，而唔會太突兀，令人覺得「其實之前已經有線索」。另外，伏筆亦可以加強故事嘅連貫性，令整體敘事更加完整同有結構 。

幾種常見技巧。其中一種係視覺母題（visual motifs），即係重複出現嘅畫面，例如迷宮、鏡或者某啲物件，透過重複去加強象徵意義。另一種係鏡頭強調，好似用構圖、對焦或者鏡頭停留時間，引導觀眾留意某啲細節。仲有「重複同回收」嘅結構，令前面出現過嘅元素喺後面再次出現並發揮作用 。最後，創作者亦會控制提示嘅明顯程度，可以好隱晦，亦可以稍為明顯，視乎想帶出嘅效果 。

類似技巧

睇埋：敘事技巧同情節

以下係類似伏筆嘅一啲敘事技巧。呢啲手法都係針對緊讀者同觀眾基於前部發生咗嘅事而形成嘅預期：

• 紅鯡魚：某件物件，讀者觀眾對佢產生咗某啲預期，但個預期唔正確。
• 卓可夫把槍：某件物件睇落唔係咁重要，但結果係出乎讀者觀眾意料咁重要。
• 扭橋：涉及情節中出現讀者觀眾意料之外嘅變化。

睇埋

• 閃回事件
• 閃進事件
• 視像遊戲嘅關卡設計

外拎

• （英文）埋下伏筆，電視橋段網由歐美嘅視角講伏筆，有列出唔同虛構作品中嘅伏筆應用。