消除類遊戲

一九八五年出嘅 SameGame

消除類係電子解謎遊戲嘅一種類型，特徵係遊戲空間中有某啲方塊或元素（參見英文：tile 一詞，大致係方形嘅磚片噉解），玩家要操作同排列呢啲方塊，令佢哋形成某啲特定嘅排序，成功嘅就會令啲方塊消失，而遊戲嘅勝利條件視乎玩家能唔能夠消除啲方塊。喺美術上，呢啲方塊可以係設計成生果、寶石、動物嘅頭像以至積木呀噉。

消除類遊戲包含廣泛嘅設計元素、玩法機制同埋玩家體驗：有啲係純粹回合制，亦有啲會加入街機式元素講求手眼協調；有唔少消除類遊戲都係要求玩家郁動啲方塊，最少三個形成一行橫行或直行嘅話就會消失，呢啲遊戲有咗個名，叫三消遊戲。

基本設計

睇埋：解謎遊戲

呢類遊戲嘅挑戰，在於要玩家望住一個睇落亂七八糟嘅空間入面，從中搵出規律。呢種遊戲嘅源起可以追溯到一九八〇年代嘅解謎遊戲，譬如係俄羅斯方塊呀噉。喺俄羅斯方塊入便，玩家要控制唔同形狀嘅方塊，呢啲方塊會不斷下跌，玩家可以要佢哋左右郁動或者旋轉（操作方塊），假如畫面底部有一行係填滿晒嘅（特定嘅排序），嗰行嘅方塊就會冚唪唥消失，為畫面騰出空間，而如果啲方塊持續噉疊得愈嚟愈高，超出畫面頂部，玩家就會輸（輸贏取決於方塊嘅消除）。到咗二〇〇〇年代，智能手機等嘅平台上出現大量嘅休閒遊戲，而呢類遊戲好多時設計上追求簡單，會採用消除類嘅遊戲機制，例如《糖果傳奇》一作就大受歡迎，喺二〇一三年成為 Facebook 上最多人玩嘅遊戲。

遊戲例子

俄羅斯方塊（俄文：Тетрис，羅馬化係 Tetris）係出自蘇聯嘅經典消除類遊戲，玩法如下：喺遊戲中，唔同形狀嘅方塊（方塊組或磚塊）會係噉由畫面上方向下跌，玩家要實時決定將呢啲方塊左右移動或者旋轉，目的係令到方塊可以啱啱好填滿一行；假如遊戲空間某一行完全填滿晒冇空位，嗰行嘅方塊就會消失而玩家會得分；假如玩家處理唔切，啲方塊愈疊愈高，疊到上頂，令到新方塊無法出現，噉遊戲就玩完，進入 GAME OVER 狀態。於是乎，玩家就可以不斷自我挑戰，睇吓自己最高可以撐到幾耐同攞到幾多分。

俄羅斯方塊講求要玩家反應快，到咗廿一世紀初仲係好多人玩，甚至仲出咗唔同變體，例如俄羅斯方塊 99 呢隻遊戲出於二〇一九年，結合俄羅斯方塊同大逃殺遊戲，有近百位玩家同時玩俄羅斯方塊，睇吓邊個可以生存到去最後。

GIF 俄羅斯方塊嘅示範

喺廿一世紀初，消除類喺手機遊戲中好常見。手機平台上有大量嘅三消遊戲。特徵係要求將三個或以上嘅方塊排成一條線（打橫打戙都得）令佢哋消失。成功消除之後，新嘅方塊會從上跌落嚟，空位可能再自動形成新嘅配對，形成連鎖反應。唔同三消遊戲會加入唔同嘅機制，令玩法更加豐富。例如喺皇家比賽一作入便，玩家要幫國王修飾城堡，關卡中會見到唔同障礙物，好似蠟燭、地毯等，需要透過特定配對先可以清除，仲有限時關卡，考驗反應。

其他例子：

• 打磚塊
• 魔法寶石
• 泡泡龍方塊
• 寶石方塊

等等。

相關爭議

睇埋：硬核心玩家

雖然消除類遊戲喺商業上非常成功，但喺電玩愛好者之間，呢類遊戲嘅地位持續偏低，低到有評論員要特登提醒玩家「鍾意玩呢啲遊戲，唔使覺得羞恥」。呢種情況可能係因為好多電玩愛好者覺得，市面上呢類遊戲數量多得滯，而且彼此之間玩法只係略有差異，設計得「好求其」－所以呢啲遊戲好似 cip1 啲噉。此外呢類遊戲屬於休閒遊戲，設計上通常都強調要易上手、玩法簡單，對普羅大眾嚟講有吸引力，而呢點同傳統電子遊戲文化所追求嘅挑戰性有一定衝突。

睇埋

• 解謎電子遊戲

參考

• Juul, Jesper (2009). A casual revolution: reinventing video games and their players. MIT Press. ISBN 978-0-262-01337-6.