toki pona

toki pona
sitelen pi toki pona li lon sitelen pona
kalama	/ˈto.ki ˈpo.na/ (kute)
mute jan	500–5000 (2021)
mama	mama Sonja
kulupu toki	toki sin
nasin sitelen	sitelen Lasina sitelen pona sitelen sitelen
toki luka	toki pona luka luka pona
nanpa toki
ISO 639-3	tok
Glottolog	toki1239
IETF	tok

jan Tepo en jan Lakuse li toki kepeken toki pona.

toki pona (/ˈto.ki ˈpo.na/) li toki sin musi tan mama Sonja. ona li pali e toki tan ni: jan li ken pona e pilin ona e toki ona. ona li pana pi tenpo nanpa wan e ona lon lipu ilo. open la ona li pini ala. mama Sonja li pana e selo pini toki lon lipu nanpa wan pi toki pona lon tenpo sike nanpa 2014. jan li kepeken lipu ona la ona li pu. tenpo sike nanpa 2021 la, mama Sonja li pana e lipu sin pi toki pona. ni li lipu ku. ona li lipu nimi pi toki pona. open la kulupu li lili. taso ona li kama suli. tenpo mute la kulupu li lon ilo. taso tenpo lili la jan li kama kulupu lon ma lon tenpo pini. nimi pi toki pona li tan toki mute: toki Topisin en toki Sumi en toki Lowasi en toki Epelanto en toki ante mute.

tan nimi

nimi "toki" li tan nimi tok pi toki Topisin tan nimi talk pi toki Inli. nimi "pona" li tan nimi bona pi toki Epelanto tan nimi bonus pi toki Lasina.

nimi pi toki pona la toki tan

nimi pi toki pona li tan toki mute ni:

1. toki Sumi 16 (13.2%)
2. toki Topisin 16 (13.2%)
3. toki Epelanto 13 (10.7%)
4. toki Lowasi 13 (10.7%)
5. toki Kanse 11 (9.09%)
6. toki Netelan 11 (9.09%)
7. toki Inli 8 (6.61%)
8. toki Katelo 8 (6.61%)
9. toki Konton 4 (3.31%)
10. toki Sonko 4 (3.31%)
11. toki ante 4 (3.31%)
12. toki mute 8 (6.61%)
13. kalama 3 (2.48%)
14. nimi sin 1 (0.83%)
15. tan li sona ala 1 (0.83%)

mute nimi pi toki pona li tan toki ante. mama Sonja li pana e nimi tawa toki pona tan toki ona. toki ona li toki Kanse li toki Epelanto li toki Inli li toki Tosi li toki ante.

tenpo pini

mama Sonja li pana e selo open pi toki pona lon tenpo suno nanpa 8 pi tenpo mun nanpa 8 pi tenpo sike nanpa 2001. tenpo suno ni li tenpo suno nanpa 9021 tan tenpo suno pi kama lon pi toki pona. mama Sonja li pana e sona pi toki pona lon lipu tokipona.org. open la jan mute li kulupu lon kulupu pi toki pona lon lipu Jaju. tenpo mute la, jan mute li kama sona e toki pona. tan ni la kulupu pi toki pona li kama suli. tenpo la, mama Sonja li pana e ante lili sin tawa toki pona.

tenpo sike nanpa 2014 la ona li pali e lipu pu lon toki Inli. ona li pana e lipu ni lon toki Kanse lon tenpo sike nanpa 2016. lipu nanpa tu pi toki pona (lipu ku) li kama lon tenpo sike nanpa 2021.

tenpo sike nanpa 2008 la jan pi toki pona li pana e lipu wile la kulupu ISO-639 li wile ala pana e nanpa toki tawa toki pona tan ni: tenpo ona la toki pona li lon lon tenpo lili taso. tenpo sike nanpa 2018 la kulupu ISO li weka e lipu wile ante tan ni: kulupu pi toki pona li lili. tenpo sike nanpa 2022 la jan pi toki pona li pana e lipu sin tawa kulupu ISO. tenpo ni la ni li pona tawa kulupu ISO. ona li pana e nanpa ni tawa toki pona: "tok".

sitelen en kalama

sitelen

toki pona la sitelen tu suli li lon. ona li sitelen Lasina li sitelen pona. lipu Wikipesija li kepeken sitelen Lasina.

sitelen Lasina

lipu suli: sitelen Lasina

sitelen Lasina pi toki pona

sitelen Lasina la sitelen pi kipisi nimi li a, e, i, j, k, l, m, n, o, p, s, t, u, w. tenpo mute la sitelen ni li suli ala. nimi ijo taso la sitelen nanpa wan li suli.

sitelen lili pi toki pona
Aa	Ee	Ii	Jj	Kk	Ll	Mm	Nn	Oo	Pp	Ss	Tt	Uu	Ww

sitelen pona

lipu suli: sitelen pona

sitelen pona la, jan li sitelen e sitelen pi sona nimi. sitelen pona la, nimi ale li jo e sitelen. lipu pu la sitelen pona li jo e sitelen 120.

kalama

kulupu kalama pi toki pona li lili. ni la jan mute li ken kama sona e ona ale kepeken tenpo lili. kalama mute li lon nimi la o wawa e kalama nanpa wan pi kulupu ni: "a, e, i, o, u".

poki anpa la kalama li lon nasin sitelen kalama pi ma ale.

	lupa pi sinpin uta	sinpin pi palisa uta	monsi pi palisa uta
kon nena	m	n
kon pini	p	t	k
kon pini lili		s
open	w	l	j

	sinpin	monsi
pini	i	u
meso	e	o
open	a

kalama ken ale la kalama mute mute mute mute luka luka tu li lon. kalama ale ken li ni:

	n monsi ala					n monsi
∅	a	e	i	o	u	an	en	in	on	un
j	ja	je	—	jo	ju	jan	jen	—	jon	jun
k	ka	ke	ki	ko	ku	kan	ken	kin	kon	kun
l	la	le	li	lo	lu	lan	len	lin	lon	lun
m	ma	me	mi	mo	mu	man	men	min	mon	mun
n	na	ne	ni	no	nu	nan	nen	nin	non	nun
p	pa	pe	pi	po	pu	pan	pen	pin	pon	pun
s	sa	se	si	so	su	san	sen	sin	son	sun
t	ta	te	—	to	tu	tan	ten	—	ton	tun
w	wa	we	wi	—		wan	wen	win	—

wuwojiti

toki pona la, kalama ''wu'' en ''wo'' en ''ji'' en ''ti'' en ''wun'' en ''won'' en ''jin'' en ''tin'' li ken ala. kin la, kalama "nm" li ken ala.

lipu pi toki pona

lipu pi mama Sonja

lipu pu la mama Sonja li pali e lipu nanpa wan pi toki pona. ona li toki e nasin toki pi mama Sonja li pana e kon nimi e nasin toki luka e sitelen pona. sitelen mute li lon ona.

lipu ku li lipu sin li lipu nimi pi toki pona tan mama Sonja. lipu ni la ona li alasa e sona tan kulupu pi toki pona li pana e kon sin tawa nimi li pana e nimi suli sin.

lipu su la lipu tu wan li lon. nanpa wan la mama Sonja li ante e toki pi lipu The Wonderful Wizard of Oz tawa toki pona. nanpa tu la mama Sonja li pali e lipu li pana e sitelen pi toki pali mute tawa pilin pona. nanpa tu wan li pini ala. taso sitelen musi mute li lon ona.

lipu u la mama Sonja li pana e nasin sitelen sin tu wan tawa toki pona li sitelen e kon nimi lon tenpo.

lipu pi jan ante

• nasin suli pi jan Melin - ante toki pi lipu "La vie de Merlin" tan jan Kupu pi ma tomo Temenu
• Toki Pona Stories: meli olin moli tan jan Fingtam Languages
• Toki Pona Stories: akesi seli lili tan jan Fingtam Languages
• jan Linsi en soweli suli tan jan Sam Wilson
• meli lili pi len loje - ante toki pi toki "Rotkäppchen". ante tan jan Sen pi lipu "musi lili".
• soweli Wini Pu en jan pi ale ale ale - ante toki pi lipu "Winnie The Pooh" tan jan Milen
• jan lawa lili - ante toki pi lipu "Le Petit Prince" tan jan Anwan Te Sesupeki
• soweli lili tu wan en soweli ike suli
• open
• uta monsuta

kulupu

kulupu mute pi toki pona li lon.

kulupu pi toki pona lon lipu Wesi li suli nanpa wan. sama la ma pona pi toki pona pi ilo Siko li kulupu suli pi toki pona.

kulupu pi ilo Telekan en kulupu pi lipu Pesepu li lon kin. jan mute li toki e toki pona kepeken ilo Ekusu li kepeken lipu toki.social pi ilo Masoton.

kulupu ma mute li lon. KTPA (kulupu pi toki pona pi ma Anku) li lon kin. sama la kulupu pi toki pona li lon lipu VK pi ma Losi.

o lukin kin

lipu open:toki pona
	lipu pu sitelen pona mama Sonja sitelen sitelen
ante mute

tan sona

toki sin