Sâta a-o contegnûo

Caterina Accame (barcu, 1889)

Sta pagina chi a l'è scrita da Prìa
Da Wikipedia
PR
 Sta pagina chi a l'è scrita da Prìa
Image
U varu da Caterina Accame, 1889

A Caterina Accame a l'êa ina nave ch'a l'è stêta custruìa pe cuntu da cunpagnìa Accame da-i ciantê Ansaldo de Sestri Punénte. A l'è stêta u primmu barcu de fêru a esse vaòn in-te tütta l'Italia, insémme a-u Cavaliere Ciampa.

Stoja

[modìfica | modìfica wikitèsto]

Stu barcu u l'è stêtu fabricòn du 1889 da-i ciantê Ansaldo de Sestri Punénte, in scia baze de di prugètti inglézi, cumisciunòn da-a cunpagnìa du patrùn Emanuele Accame, da Prìa[1]. Cun l'intrâ in servìssiu, u n'è stêtu dêtu u cumandu a-u capitàn Vincenzo Boccone de Löa, da tanti anni cu-i Accame, e a-i 5 d'utubre du 1890 a l'è sarpâ pe-a Califòrnia, dund'a l'aviéva carigòn du gran pe l'Europa, rutta dund'a l'ha batǜu pe tenpu fina i clipper inglézi[2]. In-tu vièggiu d'andâ a l'êa càriga de merse varia pe San Francisco, dund'a l'è rivâ cu-in pasàggiu ciütostu lungu, de 153 giùrni, p'avê truvòn du tenpu grammu in-tu gurfu du Leùn; a burdu a purtava u fìggiu d'ina famìggia distinta de Firénse, ch'a l'axéva mandòn lì pe fâse e òsse, ch'u l'ha tegnǜu in giurnale du sö inbarcu. A San Francisco, patìu e sòlite dizersiùi, u l'è stêtu inbarcòn séi mainê furèsti, ch'i l'han fêtu muntâ e spéze pe-e pruvigiùi; carigòn 3.281 tunêi de sacchi de gran a Caterina Accame a l'è partìa pe Falmouth, meténdughe 118 giùrni, p'esse ciamâ de de lì a Le Havre[3][4][5].

Pe-a segunda canpagna, a Caterina Accame a l'ha pigiòn u mâ cun du carbùn ingléze pe San Francisco, de dunde a l'è andâ pe urdini a Queenstown in-te 127 giùrni de navegasiùn. Dapö a l'è restâ pe quarche tenpu in-tu Levante: a l'ha fêtu Barry-Samarang in-te 119 giùrni, Surabaya-gurfu du Bengala e dunque Bassein-Falmouth càriga de rizu in-te 118 giùrni. Da-u 1894 a-u 1899 a l'ha turna viagiòn pe gran da Califòrnia, menu che pe in càregu de carbùn du 1897 da Junin a Dunkerque, bén che in-tu vièggiu d'andâ a l'agge avüu da relasciâ a Port Stanley pe du suriscaldaméntu in-te stîve. Fra-u 1899 e u 1902 a l'ha fêtu due canpagne pe de rutte sòlite e cun di pasaggi ciütostu bui[n. 1][n. 2], mentre da-u 1903 a l'è stêta pe-u ciǜ in sce rutte tra l'Europa e u Cîle, cu-in vièggiu da Holyhead a Sydney du 1907, cun da merse varia, in-te 86 giùrni. De sti tenpi a l'è stêta sutt'a-u cumandu di capitèn Giobatta Tossini e Lorenzo Maggi, mentre pe segundu a l'ha avüu u Luigi Ameglio e u Nicolò Cervetto[4][5][7].

A-i 26 de zügnu du 1913 a l'è rivâ a Falmouth da Smoky Bay a-u cumandu du capitàn Tossini, càriga de minerali, e a-i 26 de nuvénbre a l'è partìa da Swansea pe Zéna càriga de carbùn, dund'a l'è rivâ pasòn 33 giùrni. Du zenâ du 1914 a l'êa turna a Swansea dund'a l'è stêta vendǜa a-u patrùn Mario Ribatto, cu-ina fin ch'a l'ha tucòn de sti tenpi i ciǜ tanti barchi a véje di Accame. Carigòn pe Zéna cu-u növu patrùn, a l'è rivâ fina in-tu gurfu du Leùn e, curpìa da ina gran buriâna, a l'è finìa dezarbuâ. Rivâ a destìn, a-i 20 d'arvî du 1914, cun de véje fête a-a buna, a l'è stêta abandunâ a l'asegüasiùn e dunque vendǜa pe esse demulìa[1][2][4][5][7].

Descrisiùn

[modìfica | modìfica wikitèsto]

A Caterina Accame a l'êa in barcu du genere dîtu nave, a tréi èrbi a véje quaddre che, cumme dîtu, a l'axéva in scaffu fêtu d'asâ. A l'axéva ina stassa de registru de 1.780 tunêi lurdi e 1.711 netti, pe ina lunghéssa de 80,98 metri tra-e perpendiculari e ina larghéssa de 11,95 metri, cu-u puntâ ch'u pescava 6,93 m. Cumme i âtri barchi de stu genere, a Caterina Accame a l'axéva tréi èrbi a véje quaddre, cu-i èrbi de mezana e de trinchéttu ch'i muntavan di velacci duggi e cuntra, ciǜ che mustrâ de dùgge cubìe. De prûa, pe pulena, a purtava u stemma de Zéna[4][5][8].

Notte

[modìfica | modìfica wikitèsto]
Notte a-u tèstu
  1. ↑ In-te l'urdine, du 1899-1901 a l'ha fêtu Cardiff-Table Bay (77 giùrni), Table Bay-Newcastle (51), Newcastle-Chañaral (48) e Taltal-Falmouth (109). Pe-i anni 1901-1902 u l'è registròn pe cuntra Saint John-Melbourne (105 giùrni), Newcastle-Valparaiso (65) e Taltal-Rotterdam (141).
  2. ↑ In-tu detaggiu, tra-i pasaggi ch'i sun stêti i méggiu fra tütti i barchi a véje, i se pöan rigordâ: Golden Gate-Queenstown in-te 126 giurni e 9 ûe, Table Bay-Newcastle du 1898 in-te 51 giurni, Holyhead/Liverpool-Sydney du 1910 in-te 86 giurni cu-u capitàn G. Maggi[6] e Newcastle-Chañaral in-te 48 giurni.
Notte bibliugrafiche
  1. 1 2 Serafini, 2004, Storia degli armatori Accame, p. 71
  2. 1 2 (IT) Gio Bono Ferrari, L'epoca eroica della vela. Capitani di mare e bastimenti di Genova e della Riviera di Ponente nel secolo XIX, Rapallu, Arti Grafiche Tigullio, 1941, p. 108.
  3. ↑ Gropallo, 1973, Parte III. I grandi velieri moderni, I moderni corsieri: Flotta Accame, pp. 200-201
  4. 1 2 3 4 (IT) Agenzia Bozzo, 239 A. CATERINA ACCAME, in sce agenziabozzo.it. URL consultòu o 5 màrso 2026.
  5. 1 2 3 4 (IT) 051. CATERINA ACCAME, in sce agenziabozzo.it. URL consultòu o 5 màrso 2026.
  6. ↑ (EN) Shipping. Arrivals. - Jan. 19, in The Sydney Morning Herald, n. 22.470, 20 zenâ 1910.
  7. 1 2 Gropallo, 1973, Parte III. I grandi velieri moderni, I moderni corsieri: Flotta Accame, p. 201
  8. ↑ Gropallo, 1973, Parte III. I grandi velieri moderni, I moderni corsieri: Flotta Accame, p. 200

Bibliugrafìa

[modìfica | modìfica wikitèsto]

Âtri prugètti

[modìfica | modìfica wikitèsto]

Ligammi de föa

[modìfica | modìfica wikitèsto]
Estræto da "https://lij.wikipedia.org/w/index.php?title=Caterina_Accame_(barcu,_1889)&oldid=268719"